22 مليار دولار تكلفة الحرب بالعراق

و35 مليار دولار تكلفة حرب سوريا على لبنان

16/04/03

ولو شو هالمعادلي؟ رقمين بيدوخوا، وبيحيروا- وبيعقدوا كمان. بس ما كتير بيفرقوا عن بعضون باهدافون وبطرقة صرفون. 22 مليار تكلفة حرب القوات الحليفة لتحرير العراق من البعث الصدامي وظلمو، و35 مليار ركبها الشيخ رفيق تا يثبت احتلال البعث الأسدي للبنان ويبقا هو وبني تبعيية من الشتامين والمداحين بالاجرة راكبين على ضهورنا.

تصوروا حرب طويلي عريضا بالعراق كلفت لحد مبارح 22 مليار دولار؟ دخلكون قديش بدا تكون حرب سوريا على لبنان معقدي ودمويي ت كلفت لليوم 35 مليار والخير لقدام. وين راحو هالمليارات- لا طرقات متل الخلق وأغلبا عم يزحل مع الشتي، لا مجارير بتجر وبتضلَّ مسدودي، لا كهربا بتضوي، ولا طيارات بتطير، ولا اشغال ولا زراعة، ولا مواصلات بتوصل، طبعاً ما عدا بوسطات وفانات ومحادل الشقيقة اللي بشتغل بإيام بالانتخابات على خط الشام بعبدا قريطم الصنايع وساحة النجمي.؟

الحريري الراجع على رئاسة الحكومي اليوم ببوسطا شامية معباي ركاب من محطة وحدة المصار والمصير، كان وعدنا أول ما هللولو سنة ال 92 على ايام الهراوي وصهرو الفارس، كان وعدنا بالربيع، صدقو البعض وضولو شمعا عا طولو. نطفت الشمعة ونضربت مولدات الكهرباء بالجمهور وبالعربانيي وعتمت الدني ويا ناطر بعدك ناطر. بعد 11 سني من تركيبو ع الكرسي بعدوا عم يهز ومهدي بعواميد عنجر، وما ادراك ما عواميد عنجر.

ما تغير شي إلا للأسوأ وأكيد على إيديه ما راخ يتغير شي لأنو ايديه مربوطين بجنازير الشقيقة وما بيتحركوا إلا على وقع الاخوان فيا. وعدنا بالربيع، وما شفنا غير الخريف. وعدنا بالبحبوحة وضل يوعدنا تا صار تلتين شعبنا عم يعيش حالة الفقر المذل. وعدنا بالحريي حتى تعبت سجونا ومعا معتقلات الجارة بأحرارنا وتهجر من أهلنا مليون ونص مليون،حطوا محلون مليون ونص مليون عامل سوري حارمين اللبناني حتى من الهوا اللي بيتنفسو. ببركات الشيخ رفيق وباقي الشيوخ والبكاوات والاساتذة، حقولنا يبست، أرضنا بارت، حدودنا دشرت، جبالنا صارت سهول بفضل كسارات المحظيين، وصار بلدنا وكر للإرهاب والمافيات والأصولية، وساحا فالتي لجماعة السيوف والبلطات والفراريع. تحول لبناننا لمحميات لأبو محجن وأقرانوا، وتحول بلد الاشعاع والحضارة لبلد من فصيلة ال 99.9%.

صاحب هالمنجزات العظيمي الشيخ رفيق استقال مسا الاربعا وتكلف مسا الخميس. ولو شو هالسرعة. فخامة العماد خلص المشارورات بنص يوم وقال 77 بدون الحريري. طيب الباقين مين بدون؟ ما عرفنا. بالواقع كلون من بعبدا وبالنازل قالوا امرك سيدي وهيك صار. ومرحبا مشاورات ومرحبا تكليف وألف مرحبا استقالي. مسرحيي جديدة قديمي صارت معروفي وعم تكرر من ال 90. الوزارة تعينت بالشام وراح تنعلن ببيروت متل كل حكومات الطائف السابقة. ما في شي راح يتغير بمضمون الوزارة وسياستها البعيدي عن الحريي والسيادي والاستقلال بعد السما عن الأرض، التغيير سطحي وبالشكل فقط. راح يزيدوا الصهورة اتنين، جان عبيد صهر البستاني والفارس بويز صهر الهراوي وهيك بيكون الكل راضي وما في صهر احسن من صهر، إلا بالصهر والانصهار. مع بقاء الحظوة بالطبع لصهر العهد ليلو وللصهر التاني الساهران على تظبيت ومراقبة صفقات التلفون السيليولر نكاية ببني دلول. بالعربي الشامي بيسموا الخليوي.

من حسنات هالوزارة الجديدي انو راح تحل عقدة خينا بقرادوني على الطريقة السادتية متل ما ذكرت جريدة الحياة اليوم. ابتكرولو للشيخ كريم وزارة جديدة سموها وزارة الشؤون الخارجية. السادات كان سبقون عليا لما اخترع هيك وزارة لبطرس غالي الي ما كان مسموح يصير وزير خاجيي بسبب دينو. وكمان راح تنحل عقدة القنديل وراح يدخل الوزارة ويكون مع العريضي وبقرادوني فريق اعلامي يقتدي بمنجزات الصحاف وبمفهوم العلوج واباقي المفردات العلوجية من ذبح وتمير وغيرها. وهيك بتكون تحققت الوحدة الوطنية والكل تمثل بالحكومي. بالطبع ما عدا قلي على حد قول سيادة الرئيس السوري وزير خارجيتو الشرع.

قلة بتعادي سوريا الأسد ووبتشتغل لمصلحة العدو تا تعكر العلاقات المميزة القائمة بين البلدين الشقيقين وتخربط السلم الأهلي شي بيضحك ما هيك، ولكن المهم مين راح يضحك بالأخر. أكيد مش اللي عم يبيعوا بلدون ويتاجروا بمصير وكرامة ولقمة عيش أهلون. هودي اللي سماهون سيادتو قلة هني بالواقع الأكثرية وطلاب الجامعات اللبنانية شاهد حي على هالحقيقة. الأكثرية مش هني الراكبين بوسطات ومحادل بولصتا المصالح والمال والنفوذ والكفر.

بيبقا إنو بظل الاحتلال، حكومي بتروح حكومي بتجي، كلو متلن بعضون، وزرا وحكام وجوه بربارة لا أكثر ولا أقل. وسامحونا.